30 МАЈ – СВЕТСКИОТ ДЕН НА МУЛТИПЛА СКЛЕРОЗА
Темата на Светскиот ден на МС во 2022 година е „Конекции“. Четиригодишната глобална тема (2020 – 2023) има за цел да изгради поврзаност во заедницата, самоповрзување со цел добивање на квалитетна нега.
Мултипла склероза (МС) е една од најчестите невролошки нарушувања и причини за инвалидитет кај младите возрасни лица. Тоа е хронична, прогресивна, имунолошки посредувана, воспалителна и дегенеративна болест на централниот нервен систем.
Во Република Македонија секоја година се дијагностицираат околу 90-120 нови лица со МС, додека вкупно од МС боледуваат повеќе од 1.500 лица. Во светот има повеќе од 2,8 милиони лица кои живеат со МС. Многу е веројатно дека стотици илјади лица остануваат недијагностицирани и многу животи се индиректно зафатени. Повеќето лица со МС се дијагностицираат на возраст од 20 до 40 година, и околу два-три пати почесто се дијагностицираат жени наспроти мажи.
Причината за МС сеуште не е позната и до сега не постои лек, но постојат лекови кои можат да им помогнат на лицата со МС да ја стават болеста под контрола и постојат многу опции за подобрување и управување со симптомите.
