ГО НЕМА ПОВЕЌЕ МИЦЕ, ПРВИОТ МАКЕДОНСКИ ДИ ЏЕЈ
Утрово по кратко боледување замина во вечноста првиот официјален диск-џокеј во Македонија, легендарниот Михаил Бошковски (82), кого јас а и сите други го познаваа како Мице диџеј. Единствено за него композиторот Димитар Масевски напиша и песна насловена , „Еј, еј, Мице диск џокеј“.
Го знам уште од Мусандра, од „старото“ Радио Скопје, каде започна со емисијата „Клуб на дискофили“, и соработник на „Три гонга“, а потоа и од Македонското радио каде водеше евергрин емисии, кои беа неговата омилена музика, снимени на километри и километри магнетофонска лента.
Во овој тажен момент не ми е битно колку плочи имаше во својата колекција, во колку диско клубови работел, од Работнички дом па се до Мусандра, каде што и се пензионираше, колку емисии водел на Македонското радио. Она што ми е најважно е колку љубов имаше во себе за музиката, колку ги сакаше пријателите и колку „убава“ душа поседуваше.
Смртта е страшна работа, но некои луѓе имаат можност да бидат бесмртни затоа што зад нив останува нивното дело. Еден од нив беше и Михаил, Мице Бошковски.
Патувај во вечноста, драг мој Мице, а на тој пат нека те придружува музиката на твојата генерација, музиката на Ерик Клептон, Битлси и бесмртниот евергрин на Славе Димитров.
А нам ни останува да буричкаме по своите спомени и да се сеќаваме на твоите емисии „Добар ден , среќен ден“, „Кажи зошто ме остави“,„За сите времиња„, емисии во кои ти, Мице, си ги пушташе песните за своја душа и тоа во твојот стил на најавување – кратко и ефектно.
Затоа, на крајот, кратко, Збогум наш „професоре“ по најубавите предмети Ди џејство“ и водителство.
