ВАЛЕНТИНА УЗУНОВА ВТОРА НА „ПЛАЧКОВИЦА ТРЕЈЛ 2022“ НА КОЈА НАСТАПИЈА СЕДУМ ЧЛЕНОВИ НА АК „7-МИ НОЕМВРИ“.
Така, денеска, недела, 10 јули, Дарко Прошев, Валентина Узунова, Никола Ковачев, Мијалчо Андоновски, Димче Андреев, Станислав Стоименов и Мики Петровски, зедоа учество на „Плачковица Трејл 2022“. Валентина Узунова и овој пат беше на висина на задачата и го освои второто место во женска конкуренција со време од 2 часа, 15 минути и 56 секунди.
И другите членови на гевгелискиот атлетски клуб постигнаа солидни резултати. Трката е организирана по повод Петровден од страна на Здружението Трекс и ПСД Лисец во склоп на настанот „Ја сакам Плачковица“. Должината на патеката беше 18 километри со висинска разлика од 750 метри. Стартот и финишот беа од ПД Вртешка. Имаше една контролна точка на 11 километри (Црквиште), каде тркачите можеа да се освежат со течности и храна.
„Ја сакам Плачковица“ всушност е надоградување на долгогодишната традиција на настап на Рок бендови на Планинарскиот дом Вртешка на Плачковица. Богатата програма која годинава уште повеќе ги надминува рамките на традиционалната музичка програма покажува дека и во иднина манифестацијата ќе расте.
Организаторите на „Ја сакам Плачковица“ оваа година воведоа и други содржини – искачување на врвот Лисец, МТБ велосипедска тура, Плачковица Треил од Вртешка до Туртел и Црквиште. Годинава за првпат беше организирана и детска трка.
