МАРАТОНЦИТЕ КОИ ТРЧАА ВО ЧЕСТ НА TОШЕ ПРОЕСКИ, ПРЕЧЕКАНИ СО РОЗИ ВО НЕГОВОТО РОДНО КРУШЕВО
Со црвени рози и многу сеќавања крушевчани денеска напладне ги пречекаа маратонците што трчаа од Нова Градишка до Гумење во Крушево во чест на нашата и балканска музичка ѕвезда – Тоше Проески. Пред 16 години, на 16 октомври 2007 година, Тоше го загуби животот во сообраќајната несреќа што се случи кај Нова Градишка, Хрватска.
Маратонците, меѓу кои беа и гевгеличаните Анчев, Семенаков и Туртуров, своето трчање го почнаа во Нова Градишка и по 900 километри напладне пристигна и се поклонија пред неговото вечно почивалиште на Гумење во Крушево. Низ улиците до Гумење крушевчани ги пречекаа со црвени рози. Тоа е традиција што ја воспоставија учениците од средното крушевско училиште „Наум Наумоски – Борче“.
Спомен-куќата на Тоше на Гумење ги пречекува многубројните посетители и фанови кои и годинава ги има од сите краишта од Македонија и странство.
