СЛОВЕНЕЦОТ БОРУТ ПОДГОРНИК ЈА ИЗМЕРИ ПАТЕКАТА ЗА ТРКАТА „NOVEMBER RUN GEVGELIJA 2023“
Борут Подгорник, бивш маратонец, а денес атлетски судија и мерач на тркачки патеки со А лиценца, во текот на денешниот ден изврши мерење на патеката по која ќе се одвиваат уличните трки на „NOVEMBER RUN GEVGELIJA 2023“.
Со денешното мерење Гевгелија и Атлетскиот клуб “7-ми Ноември” ќе добие сертификат за адекватно измерена тркачка патека по AIMS стандардите. Важноста на овој сертификат е во тоа што само резултати и рекорди постигнати на вака сертифицирана патека се признаваат од страна на Меѓународната атлетска федерација како и Атлетската федерација на Македонија.
Борут Подгорник е роден во Марибор, и како мерач на патеки работи веќе 4 години при што има измерено над 60 патеки во Словенија, Хрватска, БИХ и Србија. Мерењето во Гевгелија тој го изврши со велосипед на кој беше поставен Jones мерач, калибриран по специјална постапка.
