Д-Р СОФИЈА ГУГОВА, ОПШТА БОЛНИЦА ГЕВГЕЛИЈА
БЕСПЛАТНИ ДЕРМОСКОПСКИ ПРЕГЛЕДИ ВО АМБУЛАНТАТА ЗА КОЖНИ И ВЕНЕРИЧНИ БОЛЕСТИ ПО ПОВОД ЕВРОПСКАТА КАМПАЊА ЗА РАНА ДЕТЕКЦИЈА НА РАКОТ НА КОЖАТА
Еуромеланома е Европска кампања за рана детекција на ракот на кожата. Тој е еден од најчестите форми на рак во светот. Обично е предизвикан од небезбедно или прекумерно изложување на сончевите УВ зраци, кои продираат и ја оштетуваат кожата со текот на времето.
Ракот на кожата може да има добра прогноза и висока стапка на излекување, сепак јавната свест за симптомите на ракот на кожата моментално е ниска, што значи дека може да се пропуштат можностите за витално рано откривање.
Затоа оваа кампања го овозможува тоа со бесплатни дермоскопски прегледи, како и совети за заштита од сонцето, во просториите на Амбулантата за кожни и венерични болести во Општа болница со проширена дејност, во деновите 18. 05. и 19. 05 2022, од 13- 15 часот.
Со ова Општата болница со проширена дејност Гевгелија ќе се приклучи кон активностите на Европската академија на дерматовенеролози и дерматовенеролозите од ЕУ за превенеција од ракот на кожа.
Канцерогените лезии се појавуваат на места кои се изложени на УВА и УВБ зраци, како што се лицето, вратот, грбот и екстремитетите. Најчесто се јавува кај луѓе на возраст над 50 години, но секој може да биде засегнат.
Стапката на дијагностицирање за сите форми на рак на кожата, не само на меланомот се зголемува, но немеланомните карциноми на кожата сè уште се недоволно пријавени во официјалната статистика, прикривајќи ја вистинската стапка на нивната распространетост.
Ракот на кожата е меѓу најчестите и најоптоварувачките видови на рак во Европската Унија. Во 2020 година, на над 106.000 граѓани на ЕУ им бил дијагностициран меланом што го прави шести најчест вид на рак и една од дваесетте најчести причини за смрт од рак, се посочува во заедничката изјава на Европската академија на дерматовенеролози потпишана од претседателите на дерматолошките асоцијации од Европа, меѓу кои и од Здружението на дерматовенеролози на Македонија.
