И ПОЖАРНИКАРИТЕ СО СВОИ БАРАЊА ДО ВЛАДАТА И ДО ЦУК
Централизирање на единиците за противпожарна заштита , регулирање на платите со иста вредност и висина на бодовите, целосно почитување на одлуката на Владата за исплата по 60 илјади денари на пожарникарите превземени од МВР и измени на Законот за пожарникарство во делот за пензионирањето.
Ова се барањата кои Независниот синдикат на државната администрација , во кој членува и Синдикатот на пожарникари на Македонија ги упатил до претставниците на Владата и Центарот за управување со кризи.
На вчерашната средбата со советникот за одбрана на премиерот, пожарникарите побарале целосно да се почитува одлуката донесена од претседателот на техничката Влада, Оливер Спасовски, каде стои дека за секој припадник на територијална противпожарна единица (ТППЕ) преземен од МВР да биде обесштетен со 60 илјади денари.
Но, доколку барањата не се реализираат во скоро време , од Синдикатот најавија протести.
