JЗУ „ЗДРАВЕН ДОМ ВАЛАНДОВО“ СО УСПЕШНА ИМПЛЕМЕНТАЦИЈА НА ПРОЕКТОТ
ЈЗУ Здравен дом Валандово во периодот 2018 – 2022 година успешно го имплементира проектот „Заеднички активности за заштита и унапредување на јавното здравје во прекуграничниот регион“ (акроним на проектот: „IPA SHIELD II“).
На почетокот на проектот целосно се реконструира системот за греење што придонесе за намалување на финансиските трошоци и остварување заштеда. Беше направена реконструкција на котелската постројка, при што беа набавени два нови котли на пелети од 200 kW со еден заеднички резервоар, паралелно поврзани со постоечкиот систем на котли на дрва и нафта.
Квалитетот на здравствените услуги кои може да ги понуди ЈЗУ Здравен дом Валандово на граѓаните од руралните подрачја е од особена важност. За таа цел во рамки на проектот IPA SHIELD II, се спроведе набавка на специјализирано возило за посета во рурални подрачја. По извршената набавка возилото веднаш е ставено во употреба. Со ова возило и ваков мобилен здравствен сервис се подобрува грижата за жителите во руралното подрачје на Валандово и околните села.
За унапредување и олеснување на работата во делот на опрема извршена е набавка на: Биохемиски анализатор; Ултразвучен уред (абдомен); Уреди за мешање струи со вакуумска електрода (за физичка медицина); како и Уред за електрична стимулација (за физичка медицина). Опремата е ставена во функција, достапна за опслужување на сите пациенти кои имаат потреба од истата.
Во рамки на проектот се одржа и информативен ден со споделување на информации за болеста дијабетес, а беа и дистрибуиран пропаганден материјал изработен во рамки на проектот.
Проектот „Заеднички активности за заштита и унапредување на јавното здравје во прекуграничниот регион (IPA SHIELD II)“, се реализира во рамки на ИНТЕРРЕГ ИПА Програмата за прекугранична соработка Грција – Македонија, а е финансиран од Европската унија и националните фондови на земјите учеснички.
