МАКРОН ИМА РАЗБИРАЊЕ ЗА БУГАРСКИТЕ БАРАЊА А ОД „СЕВЕРНОМАКЕДОНЦИТЕ“ ОЧЕКУВА ДА СЕ СОГЛАСАТ СО НИВ
„Блиску сме до договор кој овозможува правда за бугарските барања и кој е компатибилен со тоа што Северна Македонија може да го направи, потребно е видливост и доверба. “, рече Макрон.
Тој нагласи дека со „Северномакедонците” во следните часови ќе разгледува начин да се склучи договорот, за до идната недела да помине на амбасадорско ниво и да се деблокира процесот.
За Бугарија оцени дека „една земја членка со задоцнување побара промени“ и оцени дека „ЕУ не може да се преправа дека тие бараања не постојат“.
Целосна посветеност на перспективата за членство во ЕУ на Западен Балкан, забрзување на процесот на пристапување и барање брзо решение за деблокирање на евроинтеграциите за Македонија се меѓу заклучоците по Самитот на ЕУ чиј фокус годинава е ставен на проширувањето, состојбата со Украина, но и економската криза.
„Европскиот совет беше информиран за последните случувања на дискусиите меѓу Бугарија и Северна Македонија. Таа повикува на брзо решавање на последните преостанати прашања за да може да се отворат пристапните преговори без одлагање“, стои во заклучоците кои се однесуваат на Западен Балкан.
