ПРЕКРАСЕН СТАРТ НА ВТОРИОТ МЕМОРИЈАЛЕН ТУРНИР ВО БАСКЕТ „ИВАН ПЕНОВ“

На реконструираното кошаркарско игралиште, „Иван Пенов“, направено во чест и сеќавање на младиот кошаркар, кој прерано го заврши својот живот во сообраќајна несреќа на 18 годишна возраст, во една прекрасна атмосфера и пред преполнетите трибини, синоќа започна вториот по ред Меморијален турнир во баскет „Иван Пенов“. Турнирот за отворен го прогласи градоначалникот на Општина Гевгелија, Андон Сарамандов, со надеж дека овој турнир ќе расте низ годините и низ него ќе продефилираат многу млади кошаркари и спортисти. Од 28 јули до 4 август секоја вечер 12 екипи во сениорска и 9 екипи во јуниорска конкуренција ќе се борат за наградниот фонд од 1800 евра за првите 3 екипи во сениорска конкуренција и 600 евра за првопласираните во јуниорска конкуренција. Турнирот ќе заврши на 4 август, денот кога Иван Пенов требаше да го прослави својот 20-ти роденден.