ВАЛЕНТИНА УЗУНОВА, МЕТОДИЈА ИЧЕВ И МИЈАЛЧО АНДОНОВСКИ ВО ТЕШКИ УСЛОВИ, СО УСПЕХ НАСТАПИЈА НА „ТИТОВ ВРВ СКАЈРЕЈС“ НА ШАР ПЛАНИНА
Во организација на планинарскиот клуб “Македон“ и Комисијата за скајранинг при ФПСМ денес се одржа четвртото издание на планинската (скајранинг) трка “Титов Врв Скајрејс“ на Шар Планина, воедно и државно првенство во скајранинг за 2022 година. Ова е највисоката трка во Македонија на која натпреварувачите поаѓајќи од Попова Шапка го искачуваат Титов Врв 2747 мнв по гребенот (зимската патека) и се враќаат назад, притоа совладувајќи дистанца од 20 километри и 1900 висински метри по стрмен и каменест терен.
На трката оваа година учествуваа 70 натпреварувачи во машка и женска конкуренција.
Меѓу нив беа и тројца членови на АК „7-ми Ноември“ од Гевгелија, Валентина Узунова, Методија Ичев, на кого ова му беше прва висинска трка и Мијалчо Андоновски.
Како што ни изјави Методија, дождот ,ветерот и студеното време си го напраавија своето за трката од 21к 1900D+ да биде скратена на два пати за на крај да истрчаме 11к 900D+ 1ч 47м .
Валентина во женска конкуренција во вкупниот пласман го освои 8 место, а во конкуренција до 50 години, беше прва. Методија Ичев во машка конкуренција постигна 28 време, додека Мијалчо Андоновски беше 34.
Скајранингот е екстремна форма на планинско трчање кое се одвива на надморска височина од над 2000 метри, по исклучително стрмни и каменести терени. Овој спорт кој започнува да се развива во алпските земји пред 30-тина година денес доживува се поголема популарност во светот со аспирации да стане и олимписки спорт. Федерацијата за планинарство на Македонија е полноправен член на Светската скајранинг федерација (ISF), а минатата година македонска репрезентација за првпат настапи на европското првенство во Италија.
