ВО ГЕВГЕЛИЈА ОД УТРЕ, СРЕДА, 25 ОКТОМВРИ ЗАПОЧНУВА ВАКЦИНАЦИЈАТА ПРОТИВ СЕЗОНСКИ ГРИП
На вакциналниот пункт во Општата болница со проширена дејност Гевгелија, утринава пристигнаа вакцините против сезонски грип. Како што не информираше епидемиологот, д-р. Сашко Олумчев, вакцинацијата против грип ќе започне од утре, среда, на 25 октомври, кога ќе се вакцинираат првите 60 граѓани од ризичните групи кои изразија интерес на страницата vakcinacija.mk.
Министерството за здравство набави 60 илјади дози четиритипни вакцини, наменети за бесплатна вакцинација. Граѓаните од ризичните групи кои се пријавиле за вакцинација преку интернет-страницата вакцинација.мк, во следните денови преку СМС порака ќе добијат известување за точниот датум, час и место за вакцинирање.
Со бесплатната вакцинација ќе бидат опфатени лицата над 65 години, со хронични заболувања, здравствени работници, бремените жени, децата на возраст од 6 месеци до 5 години, лицата сместени во установи за социјална заштита на стари лица и вработените во тие установи.
