ВО СПОМЕН НА МИЛЕ МИЦКОВСКИ, ПРОФЕСИОНАЛЕН ВОЗАЧ И СОПСТВЕНИК НА НАЈУБАВОТО „ФИЌО“ ВО МАКЕДОНИЈА И ПОШИРОКО
Деновиве се навршија 5 години од прераната смрт на Миле Мицковски. Гевгеличани го познаваат како семеен и мошне вреден човек, кој лебот го заработуваше како шофер на товарни возила. Роден е во Кичево на 21 март 1956 година, образованието го завршува во Гевгелија, а преку 40 години работи како шофер на, најнапред 18 години во „Млаз“ од Богданци а потоа од 1995 година во сопствената фирма „Далекс“ од која со 47 години стаѓ се пензионира. Наградуван е како најдобар возач на годината во избор на ИРУ АМЕРИТ Интернационален патен транспорт од Женева. Прерано замина од овој свет на 2 октомври 2018 година.
Освен како професионален возач, Миле беше познат и како сопственик на едно прекрасно зелено „фиќо“, произведено во 1974 година, купено во 1978, кое самиот тој го дотерал и „нашминкал“ по свој ќејф, и со него учествувал на голем број на изложби на стари автомобили. Ова „фиќо“ е прогласено за најубаво во Македонија, а колкава била приврзаноста на Миле кон ова возило зборува и фактот што, иако во Швајцарија му биле понудени 14.000 евра, Миле не сакал да го продаде.
Во неговиот дом денеска грижливо се чуваат над стотината пехари, благодарници и признанија кои тој ги има освоено низ годините. Највредни се наградите за прво место на изложбите во Швајцарија, два пати во Рача, еднаш во Јагодина, како и второто место во Крагуевац. Љубовта кон овој автомобил и традицијата за учество на изложбите на „олдтајмери“ ја наследува неговиот син Александар, кој исто така до сега има освоено голем број на признанија од кои последното е од 25 септември оваа година.
