ЗЕЛС БАРА ИТЕН СОСТАНОК СО ВЛАДАТА ЗА ДА СЕ РЕШАТ ПРОБЛЕМИТЕ НА ОПШТИНИТЕ СО ЕНЕРГЕТСКАТА КРИЗА
На денешната 4-та седница на Управниот одбор на Заедницата на единиците на локалната самоуправа (ЗЕЛС ), едногласно е изгласан заклучокот за итен состанок со Претседателот на Владата, Димитар Ковачевски, а со цел изнаоѓање решение за проблемите предизвикани од енергетската криза.
Станува збор за голем проблем за кој градоначалниците веќе подолг период алармираат, а се однесува за енормното зголемување на сметките за електрична енергија, и доколку не се најде решение за надминување на оваа состојба, со тоа ќе се доведе во прашање функционирањето на општините, но и на образовните институции и јавните претпријатија.
На состанокот се дискутираше и за општата финансиска состојба на општините, каде што ЗЕЛС уште еднаш го потврди ставот дека за поголема финансиска самостојност потребно е зголемување на средствата од дотации и поголем процент од персоналниот данок на доход, како и данокот на додадена вредност.
