НА УТРЕШНАТА СЕДНИЦА НА СОВЕТОТ НА ОПШТИНА ГЕВГЕЛИЈА ЌЕ СЕ НАЈДЕ И ИНФОРМАЦИЈАТА НА МЦСР- ГЕВГЕЛИЈА СОСТОЈБАТА СО ИЗГРАДЕНОСТ НА АРХИТЕКТОНСКИ БАРИЕРИ ЗА ЛИЦА СО ПОСЕБНИ ПОТРЕБИ
На 32-та седница на Советот на Општина Гевгелија, советниците ќе ја проследат информацијата на ЈУ Меѓуопштински центар за социјална работа-Гевгелија за состојбата со изграденоста на архитектонските бариери за лицата со посебни потреби.
Меѓуопштинскиот центар, покрај информацијата, и препорачува на локалната самоуправа да ги задолжи институциите на локално ниво да планираат и предвидат финансиски средства за изградба на архитектонски бариери за лицата со посебни потреби.
Во координација со здруженијата на инвалидски организации на телесни инвалиди тие, пред советниците ќе ги посочат и проблемите со кои се соочуваат во секојдневното живеење и предлози за нивно решавање.
Така, овие лица бараат повеќе пристапни рампи, особено до банките, индивидуалните згради, супермаркетите и верските храмови. Покрај ова, овие лица имаат потреба и од посебни паркинг места, како и лифтови во станбените згради каде живеат.
За лицата со оштетен слух и говор има потреба од толкувач на ниво на локалната самоуправа, за лицата со оштетен вид изградба на тактилни патеки особено до Здравствениот дом и Општата болница, повеќе сообраќајници со спуштени рабници, како и звучни семафорски уреди.
