ОВАА ГОДИНА ОПШТИНА ГЕВГЕЛИЈА ЌЕ ГО ЧЕСТВУВА ВОЗНЕСЕНИЕТО ХРИСТОВО-СПАСОВДЕН СО ФОЛКЛОР, КЛАСИЧНА МУЗИКА, БАЛЕТ И ИЗЛОЖБИ
Општина Гевгелија и оваа година ќе го одбележи својот патронен празник-Спасовден со неколку културни манифестации. Организатор на настаните е Домот на културата „Македонија“.
Чествувањето на Вознесението Христово ќе започне на 1 јуни, среда со традиционалната манифестација „Распеана чаршија“, која ја негува македонската староградска песна и со Изложба на фотографии и видео материјал „Манастирите и црквите во гевгелиско“.
Наредниот ден, на 2 јуни, четврток, најнапред, во утринските часови, празникот ќе биде одбележан во манастирската црква „Свети Спас“ со црковна богослужба, на која се очекува да присуствуваат голем број на граѓани, како и градоначалникот на Општина Гевгелија, Андон Сарамандов.
Вечерта, Балетскиот ансамбл при Националната опера и балет ќе се претстави пред гевгеличани со балетската претстава „Ла, Ла, Ла“.
Празнувањето на Спасовден ќе заврши на 3 јуни, петок, со Изложба на Друштвото на ликовните уметници од Гевгелија и со концертот на класична музуика на која ќе настапат Маја Чаначевиќ – англиски рог и Ана Гацева-пијано.
