ЗА СВОЈОТ ПАТРОН, БОГОРОДИЦА ДОБИ РЕКОНСТРУИРАН МЛАДИНСКИ ДОМ
Богородица доби модерен објект за одржување јавни, младински и културни настани. По целосната реконструкција и уредување на просториите и дворот, Младинскиот дом „Мите Танов- Коми“ во Богородица беше свечено предаден во употреба. На настанот по повод успешната реализација на проектот на Општина Гевгелија, присуствуваа голем број гости, меѓу кои и градоначалникот на општина Гевгелија, Андон Сарамандов, кои ја проследија и културно-уметничката програма.
За реализацијата на Проектот, чија вкупна вредност изнесува 10.224.234 денари, Општина Гевгелија издвои 4.000.000 денари од општинскиот буџет, а преостанатите средства се обезбедени од Бирото за регионален развој. Имено, по успешната апликација на Јавниот повик за финансирање проекти за развој на урбаните подрачја и одржлив и урбан развој, развој на подрачјата со специфични развојни потреби и развој на селата, на Општина Гевгелија и беше доделен грант за реконструкција на младинските домови.
